kum
moch ma d aung zua
das uns nimaund sicht..
faschdek ma se enanaund
wäu s jezt ole rundumadum
iwazong haum
das unsa heazzschlog
met blosse finga
en d brenesln griffm hod..
hoed ma se medanaund
en mund med n mund zua
das uns des bumpan en bluad
ned wia r a rode aumschl
aus n hoes schbringd..
faschdek ma se gengseitech
en de eigana hoa
das unsa heazzschlog
schee launxaum und launxaum
wida zoat wiad und ruich wiad
wia windliachda r en suma
waun wo gaunz en da weidn
d zigeina schbün..
kum
moch ma d aung zua..